#قصائد
اليا مشيت اعرف دروبك وممشاك
احرص على نفسك وخالف هواها
امارة بالسو مهيب تنهاك
اقبض عليها لين يجلى صداها
اقطع نواياها بدينك وتقواك
هلل وعند الله سريع شفاها
واترك حرام القوت مهوب يملاك
كل البطون الجائعة ما ملاها
رشفة حلال تسد جوعك ومضماك
تسوى مشاريب الحرام وغثاها
النار فى جوفك وتصلا حناياك
نار الجحيم اتزيد للي وطاها
واحفظ لسانك لايجرك ويبلاك
اخذ الثمينة لو غلا مشتراها
الهرج ميزانك ويكشف خفاياك
كلمة تعيبك لاتبين نباها
صون الكلام وصون نفسك ومبداك
للنفس حشمه لاتفصم اعراها
اصمت ما دامك عارف سير مجراك
لاتنقل النمة وتبحث خفاها
يزول قدرك عند اقرب داناياك
لوهو ولد عمك حياتك جفاها
واحلم تراه الحلم يرفع مزاياك
هو سيد الاخلاق هو مبتداها
وصى به المبعوث مهوب يخفاك
شفيعنا يوم الملاقات طها
خل الجهل لاتجعل الغيض ياطاك
ترى الجهل سم القلوب وعماها
واليا ابتليت ارفع الى الله شكواك
لا بدها الايام تكشف غطاها
اصبر يزين الحظ ويزين مرماك
الله يفرجها ويرفع بلاها
لاتمنع المحروم لامن تنصاك
الناس لاجل الناس والله عطاها
ابذل لوجه الله والله يجزاك
مثل الغروس الطيب للى سقاها
لاضاع معروفك ولاضاع حسناك
ان كانها لله تلقى جزاها
جارك ولوهو جار تسقيه من ماك
عليه لاترفع يدينك عصاها
احسن جوار الجار لو كان يشناك
ترى العرب تحشم كلاب اقصراها
والظلم شين ويجعل النار مثواك
راع الظليمة عيشته ما هناها
فوقك اله العرش عارف نواياك
ينظر قلوب الناس وش محتواها
يسمع بما تجهر وعالم خفاياك
بأمره شروق الشمس ترسل ضياها
هو عالم للغيب مرتب خلاياك
وخالق فيك العروق ورواها
والضيف له حق لياجاء بحماك
قلط ضيوف الله وكرم الحاها
لاتحقر الضيفان وتشح بغذاك
مما عطاك الله قلط عشاها
وعليك باللى حزة الضيق يفداك
اليا شانت الدنيا ودارت رحاها
لامن زهمته لو على الموت لباك
عينى لاجل عينك وروحى فداها
وترى الخوي نبراس راسك وملجاك
ليا كلحت بقعا وزادت غثاها
وحذراك من بعض المخاليق حذراك
بعض العرب ما تفرقه من نساها
تلقاه تايه بين ذولا وذولاك
فيه الجهاله واصل منتهاها
شـــاهـــد أيـــضـــا
0 التعليقات:
إرسال تعليق