#قصائد
مافيه أطهر من قلوب العصافير
ولا فيه انجس من نوايا العقارب
لولا المرابح ماعرفنا المخاسير
ولولا التباعد ماعرفنا التقارب
ولو الجمالـه تنحسب بالفواتير
ماشفتنـي أفقر رجل بالمضارب
ماكل طير ٍ تعتـزيه الصقاقير
ولاكل شارب تنتخيه الشوارب
وش فايدة ربط السواني على البير
إن صار مابه للضوامي مشارب
إن كنت تنشد عن معزه وتقدير
قدر العمـايم غير قدر الجوارب
كانك كسبت من الحياة التباشير
أنا كسبت من الزمآن التجارب
ياكم هقوه.. باليال المعاسير
ضيعتـها .. مابين لحيه وشارب
ياللي تّدور للمطارق مسامير
كلمة وعمّدها على كل عارب
متن الجبل ماحرّكتـْه الاعاصير
وصدر البحر ماضايقته القوارب
ما نجهل الدنيا ولا نعلم الغيب
مير الزمان اليا تمايل تمايل
تصيب بعض أحيان وأحياناً تخيب
وأنت اعتبرها مثل كبوة أصايل
نمشي على درب الكرم والمواجيب
ولا شكينا من سموم القوايل
لو البشر ما هي تحب الأصاعيب
ما كان عاشت فالجزيره قبايل
الطيب ما يعني تجنابك العيب
الطيب كيف تطول روس الطوايل
يا صاحبي من قبل فتح المكاتيب
إقرى على الدنيا عسيف المثايل
أقسى طعون الضيف طعنة معازيب
لا من غدت بين الردى والتحايل
يا صاحبي والحزن شيخ المحاديب
تحت أمره تقوم وتطيح الحمايل
ترا الكرم يستر كبار العذاريب
وترى البخل يقطع يدين الفضايل
من شفت ناب الذيب في جيفة الذيب
آمنت بإن أهل المروّه قلايل
لا صرت ما تضمن قلوب الأصاحيب
جنب قبل تلفي عليك الفشايل
أحدن إذا مديت له طيبك يغيب
ما تملي عيونه كبار الفعايل
وأحدن يموت إن كان سويت به طيب
يخاف ما يقدر يرد الجمايل
0 التعليقات:
إرسال تعليق