مابيك تجرحني وانا ميتٍ فيك
خلّك مثل ماكنت .. بلسم جروحي
تقول عطني !؟ بس وش باقي اعطيك!
قد قلت لك من قبل .. (تفداك روحي)
القلب بيتك وأقلط .. الله يحييك
تستقبلك هوج المشاعر وبوحي
من فيض حبك خل قلبي يقهويك
دلة غلاك بوسط صدري تفوحي
يابري حالي من غلاك وتغليك
تبغي تحب .. وبالمواصل شحوحي!
ان كان مايامرك قلبك وينهيك
ماظني انه للمحبّه نصوحي
ماتدري اني كل ماحلّ طاريك
يفز يقلبي مثل برقاً يلوحي
حتى على قلبي معك صك تمليك
ياغايتي في الحب واجمل طموحي
أرقب مواعيد اللقا في حراويك
والشوق بعيون المولع فضوحي
أبني لك صروح المحبه .. واداريك
ادخل على الله لاتهدم الصروحي
ان كان هذي كلها ماتكفّيك !!
حيل الله اقوى ياتجي .. ياتروحي
#رائد_العالي
0 التعليقات:
إرسال تعليق