يالله ياعالم بسري ونجواي
ياكاتبٍ عمري وساعة مماتي
اسألك يارب الملا سامع دعاي
وسامع دبيب النمل فوق الصفاتي
انك تفرج كل همي بدنياي
وانك تحقق لي جميع امنياتي
واجعل طريق الحق نهجي وممشاي
واجعل هناي وراحتي في صلاتي
ويالله عسى قول الشهاده من شفاي
آخر كلامي قبل لحظة وفاتي
وبرحمتك ياالله تغفر خطاياي
وأسألك لاحان السؤال الثباتي
يوم انها تشهد على فعلي اعضاي
كل الجوارح شاهده عن سواتي
واجعل كتابي ياإلهي بيمناي
وبفضلك الجنه عساها جزاتي
وادعي لإخواني بالاسلام وياي
راجيك يالله تستجيب دعواتي
يارب في جودك ورحمتك رجواي
من لايخافك ماحصل له نجاتي
مالي من الدنيا ولو طال مسعاي
الا رضا ربي وديني غناتي
اما اغتنيت وفزت وارضيت مولاي
ولا على الدنيا خساره حياتي
انا بشر وابليس يخلف نواياي
وارجع وانا خجلان من سيئاتي
واليا ذكرت انه كثيره خطاياي
ذكرت رحمة خالق الكائناتي
العمر فرصه عابره والاجل جاي
واللي كتبه الله لابد ياتي
وختامها جعل الشهاده من شفاي
آخر كلامي قبل لحظة وفاتي
#رائد_العالي
0 التعليقات:
إرسال تعليق