خالد السعيدي
مرحبا بالصاحب اللي فاقده من مده
غاب عنا عقب ما شاف البلد والديره
الخبر يا صاحبي بين العرب من عده
الجمال معقله والناس فيها حيره
رائد العالي
البقا يالصاحب اللي من زمان نوده
كل ماجينا دياره ماندور غيره
عند راع الشان مضمون الخبر ويرده
وان برق برق الحيا كلاً يسوق بعيره
خالد السعيدي
باب خير بنفتحه والشر بابه سده
من حقوق الجار عند الجار قبل الجيره
العرب جاها كبر والكبر عدى حده
وكل واحد بين ربعه قام ينقر زيره
رائد العالي
من فنون اللعب فن الهجمه المرتده
والرفيق المحترم له شانه وتقديره
انفتح باب الفرج وانصك باب الشده
والعرب كلاً حسب عقله يجي تفكيره
خالد السعيدي
بين عداد العدد واللي يجيب العده
لا يجمع فالسلاح ولا يجيب ذخيره
شفت انا فرع" جديد مجهز" في جده
وقبل عام اشوف فوق اقامته تاشيره
رائد العالي
السعيدي ضاق صدره يحسب انا ضده
المحيط الاطلسي ماهوب جال بحيره
المهم الله يعز اللي جزيلاً مده
والردي ياصاحبي لاكثر خيره
خالد السعيدي
انت تعرف صاحبك محدن يبيح سده
والسما ما ضاق جوه والنجوم اتديره
الله انه يحفظ الاسلام وكل البده
ما بغينا اللي يفرقنا شملنا بتدبيره
رائد العالي
كل ماسويت بيتك جاك شي يهده
احمد الله يالسعيدي يمكن انه خيره
كل عاقل في طريقه مايضيع حده
والسعد مازال يكفخ فالعلالي طيرهً
0 التعليقات:
إرسال تعليق