الجو جو بروق ورعود وأمطار
وابن الشراري رايق اليوم جوه
قرر يغيب اليوم ومصدر إقرار
يطرد سحاب ٍ بالسما زان نوه
سلم على سلطان واحمد وعمار
وعلم طويل العمر بلغ سموه
انا دوامي مع المطر وين ماصار
والى لمع برق ٍ تقفيت ضوه
الأرض ممطوره بها ريح الأشجار
عطر ٍ سحر قلبي مع الوقع توه
لا تلومني يا امير عشقي الى ثار
يجي كذا بلسان شاعر مفوه
جب الحطب ياغيث وأوقد لنا النار
وقرب معاميلك لنا الكيف سوه
واعزم وزير التربيه عبر الأقمار
نسمر لنا ليله مع البر خوه
قل له أبويه عقبكم ساكن ديار
سقفه سما ونجوم وارض ٍ خلّوه
وختامها صلو على سيد الأخيار
اخر رسول ٍ خاتم ٍ للنبوه
^الشاعر عيد معاند الشراري
^رد معجب الصقيري العنزي
يا عيد دام الجو به غيم وامطار
وسهيل توه طالع وسط جوّه
والضيقه الي وسط قلبي من الدار
بين الضلوع العوج قامت تأوّه
والقيض زودها على كل مشوار
واخلاقنا ياعيد قامت تشوّه
أنا معك باغيب وأصدّر إقرار
مع التحيه لين ياصل سموّه
يامير أنا باغيب لو صار ما صار
واطرد سحابٍ بالسما زان نوّه
والمعذره يامير لا جتك الاخبار
واللي تبي يامير معذور سوّه
لو تخصم الراتب وتعطيني إنذار
ماهمني مادام بالذيب خوّه
وزيرنا ياعيد بالشعر له كار
ويفهم مشاعر شاعرٍ ضاق توّه
ياعيد جهز عزبتك مابها أعذار
نبغى نسج الرجل لا قلت قوّه
ياصاحبي خوتك مكسب ومقدار
وانتم هل الوقفات واهل المروّه
يازين من عقب المطر شبة النار
وتركي معاميلك على جال ضوّه
وتشوف لون الارض من تحت الاشجار
اليا انعكس وجه السحابه تموّه
ولاهب نسناس الهوا صابه الزار
يدفن هموم القلب في وسط هوّه
ياعيد عجل لو غيابك به أضرار
مادام صوت الرعد زايد بدوّه
ترى الرجل لا ضاق يزبن على الغار
لا صار يعرف صاحبه من عدوّه
خوة شرف ماهي على العيب والعار
مثل الجبال الشاهقه في علوّه
واللي كفل للطير رزقه اليا طار
يرزق صغارٍ من ورانا تفوّه
0 التعليقات:
إرسال تعليق