عشق بن سعيدان
ميدان شعر وليلةٍ تشرح البال
اما طلعنا بربح ولا خساره
مادام لي بين الطحاطيح منزال
الشكر للي قد عطاني لاماره
رائد العالي
يامرحبا حييت ياطيب الفال
وانته ومثلك معرفتكم تجاره
الكايده ماهازها كل رجال
واللي زرع له زرع يجني ثماره
عشق بن سعيدان
دام البقا واهلين ياعالي العال
لاصرت من ربعاً تحب الصداره
تلعبنا الدنيا من الجال للجال
الله على قصراً تهزهز جداره
رائد العالي
للهرج نقاده وللعرف عقّال
والحر يستكفي بلمح الاشاره
ياللي تهوز طويق ماهو بينشال
ميّز وذوق الحاليه والمراره
عشق بن سعيدان
ماعاد للخيل المسماه خيال
لاكن رايد كلنا في انتظاره
يشيل اله شيً ولاهوب ينشال
ماحرك جيوشه ولاشن غاره
رائد العالي
مازالو الفرسان بديار الابطال
كلاً على الميقاف يقدح شراره
مالك على بعض المواضيع مدخال
انزل من الصندوق رح للغماره
عشق بن سعيدان
حنا النا في عالية نجد تمثال
والا اكثر العربان ماشب ناره
يارايد العالي على كل الاحوال
انته تبيها جد والا عياره
رائد العالي
عشق يحاول ويتحايل ويحتال
يبني من كبار السوالف عماره
يابن الحلال انته تطاول لك جبال
يحتاج لك وقتٍ طويل ومهاره
0 التعليقات:
إرسال تعليق