يابوخلف/بن_ظافر

يابو خلف لتقول لي وشفيك ولا وش جرا ..
سبة جروح الحارثي انت ومطر تقرونها ..

عز الله انّ مابه صحيب الا بعلمي زد درا ..
واهل المحبه تنعرف بسواد تحت اعيونها ..

احدٍ لزم حبل الامل واحدٍ ورا حبله جرا ..
وانا ومثلي نلتهي بجروحنا وطعونها ..

اشوف خلي لاسرح واشوف خلي لاسرا ..
اليا لمحته فامت اعيوني تغايض نونها ..

الشعر يلعبه يمين امرار وامرار ايسرا ..
والعنق كنه عنق ريم اليا رموا يخطونها ..

راع العيون الناعسه ورموشها ستر وذرا ..
لا سلهم ابعينه لخلق الله تراموا دونها ..

والخشم كنه موية الشلال يحدر من كرا ..
وخدود بيضٍ لو طلع لشمس غير لونها ..

ابو ثمانٍ لونها مثل القمر واحلى ترا ..
واليا ضحك غمازتينه قلت انا مرهونها ..

ابو شفايف كنها الرمان والله اكبرا ..
واكبر قهر يابو خلف لا عظها بسنونها ..

ناعم ولا عمره مشا حافي على وجه الثرا ..
واليا مشا الارداف تتبع خطوته وتصونها ..

هو اصغر العنقود لاكن بالدلع هو اكبرا ..
واليا زهم لميمته جاته عديّ يعيونها ..

هذي ثلاث اسنين من فرقاه والحال افشرا ..
والحزن كنه غيم وعيوني تهل امزونها ..

منساه لو انسى هلي وديار ربعي في ضرا ..
منساه لين الروح بتراب القبر يرمونها ..

اما بجيني يعتذر واللي تعذر يعذرا ..
ولا على قول المثل ليلى جفت مجنونها ..

   عبدالرحمن عبدالله الشلوي

شـــاهـــد أيـــضـــا