حنا الشلاوى للكرم مضرب امثال /بن_ظافر

المدح مايصرف على شان الاموال ..
وكلٍ على قده يفصل ثيابه ..

المدح فال ارجال توفي بالافعال ..
اللي لهم فالوقت عز ومهابه ..

ويالله تجملني على كل الاحوال ..
ولاقلت قول الا وحاسب حسابه ..

انا جبل راسي ومن قدمي اجبال ..
شاعر وامثل فالمواقيف لابه ..

ربعي الشلاوى فالشدايد لي اضلال ..
افخر بهم في سلم ولا حرابه ..

حنا الشلاوى للكرم مضرب امثال ..
واليا لفانى الضيف نكرم جنابه ..

نباشره بالعود الازرق وبالحال ..
ونثني الترحيب يامرحبا به ..

ونمدله من دلة الكيف فنجال ..
من دلة الرسلان يهنى شرابه ..

يقلط على صحون الشحم طيب الفال ..
وحليب خلفاتٍ له القرم جابه ..

ودخيلنا نحميه من شر الانذال ..
لو كان دونه قوم ولا عصابه ..

واخصامنا من فعلنا صابها اهبال ..
وكلٍ قدم ربعي ينوخ ركابه ..

افعالنا والله ماتنعد واثقال ..
ادخل على التاريخ تلقى الاجابه ..

هذاك يوم ان الجهل حط منزال ..
والناس تتبع في هواه وسرابه ..

واليوم نمشي من تحت حكم الابطال ..
على العدل والسيف حده نصابه ..

ولاقول غير الصدق والصدق ينقال ..
ماهمني منهو زعل او رضابه ..

ما يجحد احقوق المناعير رجال ..
ولاني بجاحد من بعيد وقرابه ..

كل القبايل عندها افعال وابطال  ..
والنعم في خندف ونعم ابشبابه ..

رجالهم بالمرجله حط منزال ..
وليا وقف بين فخصمه صوابه ..

والشر دونه حطوا أبواب واقفال  ..
والله يسود وجه من طق بابه ..

هذا مقال الهايفي سمح الاقبال ..
من دون نفسه ماحاضر بالنيابه ..

وصلاة ربي عد ما هل همال ..
على النبي وعداد وبل السحابه ..

شـــاهـــد أيـــضـــا